Vinnusmiðjan er ætluð körlum með krabbamein í blöðruhálskirtli og mökum þeirra. Tilgangur vinnusmiðjunnar er að styrkja pör í að höndla sameiginlega þær breytingar sem geta orðið á kynheilsu karla við meðferðir á krabbameini í blöðruhálskirtli svo sem breytingar á kynhvöt,  kynsvörun og nánd.

Fjallað verður um kynheilsu karla eftir skurðaðgerð og aðrar meðferðir við krabbameini í blöðruhálskirtli, risbata og hvað felst í svonefndri kynlífsendurhæfingu. Farið verður í hvað einkennir árangursríkan kynlífsbata hjá pörum og nefnd ólík mynstur á aðlögun þeirra varðandi kynlíf og nánd eftir krabbameinsmeðferð. Loks verður rætt um áhugahvöt og áherslur í kynlífi, valkosti í stöðunni og þau fjölmörgu úrræði sem geta eflt og styrkt kynlíf og nánd.

Í fyrri hluta vinnusmiðjunnar verður fræðsla á formi fyrirlestrar og gefin kostur á spurningum og umræðum meðal þátttakenda en í seinni hluta vinnusmiðjunnar verða lögð fyrir einstaklings-og paraverkefni. Áhersla er lögð á trúnað og virðingu í samskiptum á vinnusmiðjunni og hafa allir þátttakendur skýrt val um hvort þeir kjósi að tjá sig eða ekki.

Vinnusmiðjan verður haldin í Forvarnarmiðstöðinni Hverafold 1-3 í Grafarvogi í Reykjavík, nýrri aðstöðu hjá Krabbameinsfélaginu Framför. Vinnusmiðjan verður laugardaginn 28. janúar kl. 10:00 til 13:30 og húsið opnar kl. 09:45 og hægt að fá sér kaffi eða te. Hlé verður gert á vinnusmiðju kl. 11:00 – 11:20 og þá boðið upp á kaffi/te og meðlæti. Nánari upplýsingar um dagskrá www.framfor.is/kynlifognand

​

• Þáttaka í vinnusmiðju er án endurgjalds.

• Þátttaka takmarkast við 20 manns (10 pör). Ef vinnusmiðja fyllist verður önnur haldin í byrjun febrúar

• Ekki er gert ráð fyrir að þátttakendur tjái sig um persónuleg málefni.